Musavvir Sabzwari
ishq ki aanch men sundarta ka bhi dhan jalta hai
parvane ki chita par sham.a ka joban jalta hai
agni-ban hain teri nazren a.ina mat dekh
tere shish-mahal ka ik ik darpan jalta hai
rang-rup ki lau bhi nazar us bhed ko kya jaane
ruup aaya hai gulshan par ya gulshan jalta hai
jab jab sulge koi mohan yaad to barson tak
miTTi ka Tiila ankhon ka suuna ban jalta hai
dil ki lagi kis or bujhe ik jalte dil ke saath
saara purab pachchhim utar dakhkhan jalta hai
mere soz-o-saz ke rasiya tujh ko kya ma.alum
saat suron ki aag men mera tan-man jalta hai
ang ang men us ke ‘musavvir’ narm laven si hain
jab vo haath men kangan pahne kangan jalta hai
Leave a Reply