kun ke kahne men jo hua so hua
raanD rona na ro hua so hua
jo azal men qalam chali so chali
bad hua ya niko hua so hua
ranj o rahat men iḳhtiyar nahin
raazi ho ya na ho hua so hua
yuun na ho yuun ho yuun hua so kyuun
kya hai ye guftugu hua so hua
shikva qismat ka shikva-e-haq hai
bak na ḳhamosh ho hua so hua
haath aata nahin baghair nasib
paanv phaila ke so hua so hua
jo muqaddar tha ho chuka ‘hatim’
fikr men dam na kho hua so hua
Leave a Reply