Ahsan Marahravi
mutmain apne yaqin par agar insan ho jaae
sau hijabon men jo pinhan hai numayan ho jaae
is tarah qurb tira aur bhi asan ho jaae
mera ek ek nafas kaash rag-e-jan ho jaae
vo kabhi sehn-e-chaman men jo ḳhiraman ho jaae
ghuncha balida ho itna ki gulistan ho jaae
ishq ka koi natija to ho achchha ki bura
ziist mushkil hai to marna mira asan ho jaae
jaan le naaz agar martaba-e-ijz-o-niyaz
husn sau jaan se ḳhud ishq ka ḳhvahan ho jaae
mere hi dam se hai abad junun-ḳhana-e-ishq
main na huun qaid to barbadi-e-zindan ho jaae
hai tire husn ka nazzara vo hairat-afza
dekh le chashm-e-tasavvur bhi to hairan ho jaae
diid ho baat na ho aankh mile dil na mile
ek din koi to puura mira arman ho jaae
main agar ashk-e-nidamat ke javahir bhar luun
tosha-e-hashr mira gosha-e-daman ho jaae
le ke dil tark-e-jafa par nahin raazi to mujhe
hai ye manzur ki vo jaan ka ḳhvahan ho jaae
apni mahfil men biTha lo na suno kuchh na kaho
kam se kam ek din ‘ahsan’ pe ye ehsan ho jaae
Leave a Reply