Putli Ki Ewaz Hun But-E-Rana-E-Banaras

putli ki evaz huun but-e-raana-e-banaras

allah phir in ankhon ko dikhlae banaras

rota huun banaras ke tasavvur men shab-o-roz

ai hinduo dekho ye hai dariya-e-banaras

meri ye vasiyyat se ki mar jaun agar main

to bad-e-saba khaak ko pahunchae banaras

hai kaaba-e-maqsud faqat kucha-e-dil-dar

kafir huun jo mujh ko ho tamanna-e-banaras

nazim ho mohammad ka agar lucknow jaun

is mulk men huun maadilat-ara-e-banaras

kaabe men dua mangunga main apne khuda se

yarab but-e-kafir mujhe bulvae banaras

bangal ko ravana huun raqiban-e-siyah-ru

mere liye ho maskan-e-mava-e-banaras

main khush huun tu abad rahe varna ilahi

phir piipe se barut ke odh jaae banaras

jab se mujhe qismat ne banaras se chhudaya

rahta hai zaban par mire bas haae banaras

ik gesuon vaale ki mohabbat ka pada pech

pahle to na tha mujh ko ye sauda-e-banaras

ai ‘mehr’ tavarud hon jo mazmun to baja hai

main aur ‘hazin’ donon hain shohda-e-banaras

Leave a Comment