ek muddat se to Thahre hue paani men huun main
aur had ye hai ki kahna hai ravani men huun main
zindagi jakḌe hue thi mire andar mujh ko
maut ke ba.ad laga jaise ravani men huun main
mere hone pe jahan mujh ko hi shak hota tha
aaj us shahr ki nayab nishani men huun main
mera kirdar to bilkul bhi nahin mujh jaisa
koi batla.e mujhe kis ki kahani men huun main
kitni hi tarah se kaghaz pe likhun ḳhud ko magar
mujh ko ma.alum hai bas ek ma.ani men huun main
ḳhud ko ta.amir karun aur bikhar bhi ja.un
apni nakam tamannaon ke saani men huun main
qabr viran mire jism se baḌh kar to nahin
kis liye ḳhauf-zada naql-e-makani men huun main
hadse dard ghuTan saare vahi hain keval
ab ke kirdar kisi aur kahani men huun main
mere jazbat to buḌhon ki tarah lagte hain
sirf chehra ye batata hai javani men huun main
Leave a Reply