Shabnam Shakeel
ham to gavah hain ki ghalat tha likha gaya
kya faisla hua tha magar kya likha gaya
ye kaisi munsifi thi ki munsif ke ru-ba-ru
jhuti shahadaton ko bhi sachcha likha gaya
maktub-e-gham hamara padha hi nahin gaya
varna to us men haal tha saara likha gaya
mulzim ko bhi to milta hai kuchh bolne ka haq
phir kyuun nahin bayan hamara likha gaya
ham chup rahe ki faisla saara tha tai-shuda
yaani jo muddai ne likhaya likha gaya
banti kisi bhi harf ki pahchan kis tarah
jo bhi likha gaya vo adhura likha gaya
bhuli nahin vo zulm ki ‘shabnam’ sar-e-furat
atish ko aab dasht ko dariya likha gaya
Leave a Reply