Bana Husn-E-Takallum Husn-E-Zan Aahista Aahista

Shaz Tamkanat

bana husn-e-takallum husn-e-zan ahista ahista

bahar-surat khula ik kam-suḳhan ahista ahista

musafir raah men hai shaam gahri hoti jaati hai

sulagta hai tiri yadon ka ban ahista ahista

dhuan dil se uThe chehre tak aa.e nuur ho jaa.e

baḌi mushkil se aata hai ye fan ahista ahista

abhi to sang-e-tiflan ka hadaf banna hai kuchon men

ki raas aata hai ye divana-pan ahista ahista

abhi to imtihan-e-abla-pa hai bayaban men

banenge kunj-e-gul dasht-o-daman ahista ahista

abhi kyunkar kahun zer-e-naqab-e-surmagin kya hai

badalta hai zamane ka chalan ahista ahista

men ahl-e-anjuman ki ḳhalvat-e-dil ka mughanni huun

mujhe pahchan legi anjuman ahista ahista

dil-e-har-sang goya sham-e-mehrab-e-tamanna hai

asar karti hai zarb-e-kohkan ahista ahista

kisi kafir ki shoḳhi ne kahlava.i ghazal mujh se

khulega ‘shaz’ ab rang-e-suḳhan ahista ahista