Najeeb Ahmad
shab bhali thi na din bura tha koi
jaisa ji ko tire laga tha koi
ashk the kirchiyan thiin ankhen thiin
aa.ine se umanD paḌa tha koi
TuuT kar kis ne kis ko chaha tha
kis ka malba uTha raha tha koi
laakh anchal hava ke haath men the
sar-barahna magar khaḌa tha koi
apne hi sar men Dalne ke liye
ḳhaak apni uḌa raha tha koi
apni marzi se kaun qatl hua
apni marzi se kab jiya tha koi
hashr barpa tha mere dil men ‘najib’
khiḌkiyan kholne laga tha koi
Leave a Reply