Haseebul Hasan
kisi pari ke ḳhayalon men raqs karte rahe
hamari aankh se aansu nikal ke uḌte rahe
ham aise patte ana-zad bhi bala ke the
bahar rut men daraḳhton se laḌ ke jhaḌte rahe
kisi ke lafz gire abshar ke manind
hamare dil men musalsal shigaf paḌte rahe
kisi ko mangne aa.i thi minnaton se koi
ka.i faqir mazaron pe sar paTaḳhte rahe
hamari niind na-jane kahan bhaTakti rahi
hamare ḳhvab hamare liye taḌapte rahe
tumhare ba.ad main hansta raha magar yaram
tumhare ba.ad to dushman bhi ro ke milte rahe
ab un ko log ‘hasan’ shesh-nag kahte hain
jo ek arsa miri astin men palte rahe
Leave a Reply