agar chhuTa bhi us se a.ina-ḳhana to kya hoga
vo uljhe hi rahenge zulf men shana to kya hoga
bhala ahl-e-junun se tark virana to kya hoga
ḳhabar aa.egi un ki un ka ab aana to kya hoga
sune jaao jahan tak sun sako jab niind aa.egi
vahin ham chhoḌ denge ḳhatm afsana to kya hoga
andheri raat zindan paanv men zanjir-e-tanha.i
is aalam men mar ja.ega divana to kya hoga
abhi to mutma.in ho zulm ka parda hai ḳhamoshi
agar kuchh munh se bol uThTha ye divana to kya hoga
janab-e-shaiḳh ham to rind hain chullu salamat hai
jo tum ne toḌ bhi Daala ye paimana to kya hoga
yahi hai gar ḳhushi to raat bhar ginte raho taare
‘qamar’ is chandni men un ka ab aana to kya hoga
Leave a Reply