koi as-pas nahin raha to ḳhayal teri taraf gaya
mujhe apna haath bhi chhu gaya to ḳhayal teri taraf gaya
koi aa ke jaise chala gaya koi ja ke jaise gaya nahin
mujhe apna ghar kabhi ghar laga to ḳhayal teri taraf gaya
miri be-kali thi shaguftagi so bahar mujh se lipaT ga.i
kaha vahm ne ki ye kaun tha to ḳhayal teri taraf gaya
mujhe kab kisi ki umang thi miri apne aap se jang thi
hua jab shikast ka samna to ḳhayal teri taraf gaya
kisi hadse ki ḳhabar hui to faza ki saans ukhaḌ ga.i
koi ittifaq se bach gaya to ḳhayal teri taraf gaya
tire hijr men ḳhur-o-ḳhvab ka ka.i din se hai yahi silsila
koi luqma haath se gir paḌa to ḳhayal teri taraf gaya
mire iḳhtiyar ki shiddaten miri dastaras se nikal ga.iin
kabhi tu bhi samne aa gaya to ḳhayal teri taraf gaya
Leave a Reply