ham jo din-rat ye itr-e-dil-o-jan khinchte hain
naf.a kam karte hain ai yaar ziyan khinchte hain
sochne ke liye mauzu-e-suḳhan koi nahin
sub.h se shaam talak sirf dhuan khinchte hain
main ne muddat se koi sach bhi nahin bola hai
phir mujhe daar pe kyuun ahl-e-jahan khinchte hain
ab bhi rahte hain bahut aise bahadur jo yahan
duudh piite hue bachchon pe kaman khinchte hain
vo musahib jo zaban kholte Darte the kabhi
ab vahi mere buzurgon ki zaban khinchte hain
mere qatil mujhe pahchan ga.e hain shayad
varna kyuun jism se yuun nok-e-sinan khinchte hain
rahguzaron ki hava ka to main jandada na tha
kyuun miri na.ash ko galiyon men yahan khinchte hain
Leave a Reply