itni hava na va.iz-e-din-dar bandhiye
izzat sanbaliye sar-e-dastar bandhiye
gum kijiye havas ko tafsir-e-hosh men
danish ko jahl jahl ko pindar bandhiye
mahrum-e-hosh soiye par diije dad-e-hosh
gul ko giyah dasht ko gulzar bandhiye
bu chhiniye gulon se ki dete hain zauq-e-fan
yuun ḳhush-nava tuyur ki chahkar bandhiye
ab juz hava nahin hai girah men hamari ḳhaak
sau baar kholiye use sau baar bandhiye
bhaḌki hai aag ‘arsh’ ḳhayaban-e-bazm men
hadd-e-jalal-e-sho.ala-e-guftar bandhiye
Leave a Reply