raat aai hai bachchon ko paḌhane men laga huun
ḳhud jo na bana un ko banane men laga huun
vo shaḳhs to rag rag men miri guunj raha hai
barson se gala jis ka dabane men laga huun
utra huun diya le ke nihan-ḳhana-e-jan men
soe soe aaseb jagane men laga huun
patthar huun to shishe se mujhe kaam paḌa hai
shisha huun to patthar ke zamane men laga huun
fankar ba-zid hai ki lagaega numaish
main huun ki har ik zaḳhm chhupane men laga huun
kuchh paḌhna hai kuchh likhna hai kuchh rona hai shab ko
main kaam sar-e-sham chukane men laga huun
aise men to ab sabr bhi mushkil hua ‘akbar’
sab kahte hain main us ko bhulane men laga huun
Leave a Reply