isi mamul-e-roz-o-shab men ji ka dusra hona
havadis ke tasalsul men zara sa kuchh naya hona
hamen to dil ko bahlana paḌa hiile havale se
tumhen kaisa laga basti ka be-saut-o-sada hona
sanam bante hain patthar jab alag hote hain Takra kar
ajab kar-e-abas miTTi ka miTTi se juda hona
magar phir zindagi bhar bandagi duniya ki hai varna
kise achchha nahin lagta hai thoḌa sa ḳhuda hona
miTana naqsh us ke baagh ki kohna fasilon se
hare patton pe us ke nam-e-nami ka likha hona
Leave a Reply