Shifa Kajgavnwi
ai ḳhuda tar mire sahraon ka daman kar de
abr ko moḌ de is samt ko savan kar de
is se pahle ki koi toḌ ke bikhra de mujhe
mere malik tu mere hausle aahan kar de
ḳhar-o-ḳhas ki hi hukumat hai gulistanon men
apni rahmat se hara mera ye gulshan kar de
hilm aisa ki jo dushman ko bana le apna
ilm vo de jo ḳhayalat ko raushan kar de
tujh ko allah ne baḳhsha hai ‘shifa’ kya kya kuchh
band har vaqt ka ye nala-o-shevan kar de
Leave a Reply