mujhe ujlaton men na paḌh zara mujhe vaqt de
main huun muddaton men likha hua mujhe vaqt de
mujhe hosh aane de ham-safar main huun be-ḳhabar
mujhe vaqt de abhi Thahar ja mujhe vaqt de
mujhe ab-o-dana-e-hosh de abhi sabr rakh
vo zamin-e-aql pe ug raha mujhe vaqt de
koi shakl de mujhe ai musavvir-e-dil-figar
mujhe canvas pe utaar aa mujhe vaqt de
gham-e-ishq mujh ko muaaf kar ki main huun abhi
gham-e-rozgar men mubtala mujhe vaqt de
mujhe rakh ke chaak pe bhuul mat mere kuza-gar
mere ḳhal-o-ḳhad bhi bana zara mujhe vaqt de
mujhe hairaton se nikal de mujhe chhu ke dekh
mere yaar hosh men aa zara mujhe vaqt de
Leave a Reply