Sahir Ludhianvi
khuddariyon ke khuun ko arzan na kar sake
ham apne jauharon ko numayan na kar sake
ho kar kharab-e-mai tire gham to bhula diye
lekin gham-e-hayat ka darman na kar sake
tuuta tilism-e-ahd-e-mohabbat kuchh is tarah
phir aarzu ki shama firozan na kar sake
har shai qarib aa ke kashish apni kho gai
vo bhi ilaj-e-shauq-e-gurezan na kar sake
kis darja dil-shikan the mohabbat ke hadse
ham zindagi men phir koi arman na kar sake
mayusiyon ne chhin liye dil ke valvale
vo bhi nashat-e-ruh ka saman na kar sake
Leave a Reply