Guhar Ko Jauhari Sarraf Zar Ko dekhte Hain

Sheikh Ibrahim Zauq

guhar ko jauhari sarraf zar ko dekhte hain

bashar ke hain jo mubassir bashar ko dekhte hain

na khuub o zisht na aib-o-hunar ko dekhte hain

ye chiiz kya hai bashar ham bashar ko dekhte hain

vo dekhen bazm men pahle kidhar ko dekhte hain

mohabbat aaj tire ham asar ko dekhte hain

vo apni burrish-e-tegh-e-nazar ko dekhte hain

ham un ko dekhte hain aur jigar ko dekhte hain

jab apne girya o soz-e-jigar ko dekhte hain

sulagti aag men ham khushk-o-tar ko dekhte hain

rafiq jab mire zakhm-e-jigar ko dekhte hain

to charagar unhen vo charagar ko dekhte hain

na tumtaraq ko ne karr-o-farr ko dekhte hain

ham aadmi ke sifat o siyar ko dekhte hain

jo raat khvab men us fitnagar ko dekhte hain

na puchh ham jo qayamat sahar ko dekhte hain

vo roz ham ko guzarta hai jaise iid ka din

kabhi jo shakl tumhari sahar ko dekhte hain

jahan ke ainon se dil ka aina hai juda

is aine men ham aina-gar ko dekhte hain

bana ke aina dekhe hai pahle aina-gar

hunar-var apne hi aib-o-hunar ko dekhte hain