Tashna Azmi
miri be-ḳhvab in ankhon ke manzar bol paḌte hain
ye chadar bol paḌti hai ye bistar bol paḌte hain
bhala kaise chhupa.un apna ye pur-dard afsana
main chup rahta huun to gham ke samundar bol paḌte hain
baja.e ansuon ke ḳhuun barsati hain ye ankhen
purane zaḳhm jab is dil ke andar bol paḌte hain
hai jis ka naam sachcha.i bas us ke haq men tum aur ham
magar tardid men lashkar ke lashkar bol paḌte hain
hamari lab-kusha.i par hai kyon kar itna hangama
musalsal Thokaren kha kar to patthar bol paḌte hain
miyan aisi adalat men bhala insaf kya hoga
jahan mazlum se pahle sitam-gar bol paḌte hain
ghanimat hai ki ab bhi badalon ki oT se ‘tashna’
andheron ke muḳhalif mah-o-aḳhtar bol paḌte hain
Leave a Reply