tamam umr safar ka samar milega mujhe
pas-e-ufuq hi kahin ab to ghar milega mujhe
ye kis liye main ḳhala-dar-ḳhala bhaTakta huun
vo kaun hai jo mira chand par milega mujhe
mila na jis ke liye ghar ka narm garm sukun
yahin kahin vo sar-e-rahguzar milega mujhe
azaab ye hai ki tanha kaTegi umr tamam
safar ke baad koi ham-safar milega mujhe
kahin dikha.i na de kaash chhoḌne vaala
kahunga kya main use ab agar milega mujhe
Leave a Reply