Poet
baat tumhari aaj tak koi hui hai kab ghalat
tum jo kaho vo sab baja ham jo kahen vo sab ghalat
aap ka va.ada kal bhi tha aaj hai va.ada dusra
qaul-o-qarar aap ka jab na ghalat na ab ghalat
dil men thi maujzan ḳhushi shauq fuzun tha har ghaḌi
din men jo kuchh umiid thi ho ga.i vaqt-e-shab ghalat
kyuun na gaya payambar ghair ke paas bhuul kar
aisi suna.i aa ke baat ho ga.i sab tarab ghalat
ghair kahe vo sab durust aap kahen vo sab baja
baat hamari haq bhi ho hoti hai be-sabab ghalat
ghair ka da.ava-e-vafa kizb ki intiha nahin
aa ke suna.i dastan ek sire se sab ghalat
‘hafiz’-e-haq-pasand ki baat ki qadr thi kabhi
harf-e-ghalat ki tarah kyuun ho gaya ḳhud vo ab ghalat
Leave a Reply