banjar zamin pe chadar-e-sarsabz Daal de
dariya huun mujh ko janib-e-sahra uchhal de
tera hi nuur un ke badan se ho jalva-gar
mere likhe huruf ko aisa jamal de
uTThen jo mere paanv to dharti ho raqs men
ye ka.enat raqs kare vo dhamal de
hairat ki dhuup se bhi na pighle vajud-e-barf
rabb-e-kamal mujh ko hunar be-misal de
mera qadam qadam ho zamanon men mo’atabar
mere nuqush-e-jism ko jah-o-jalal de
bandha na ho kisi ne jise silk-e-sher men
meri zaban-e-fikr ko aisa ḳhayal de
kashkol tere samne ‘fa.ez’ ne rakh diya
rahmat-ba-dast sikke nigahon se Daal de
Leave a Reply