Mohammad Khalid
ishq men ab ke hamen jaan se guzarna bhi to hai
kaam hone ka nahin kaam ye karna bhi to hai
aur phir samne hai ḳhak-nashinon ka jahan
ye qadam ham ne kisi ḳhaak pe dharna bhi to hai
aur ik kaam nikal aata hai har kaam ke beach
hamen jiina hi nahin hai hamen marna bhi to hai
shahr men aur bhi hoga koi ḳhush-ḳhu tujh sa
aḳhir-e-kar tere zaḳhmon ne bharna bhi to hai
ham se be-maya hi taqdir hain is aalam ki
ḳhaak ne chehra-e-dauran pe bikharna bhi to hai
nahin aisa bhi jari koi magar is dil ne
kisi andesha-e-be-nam se Darna bhi to hai
jab ye tai hai ki nahin lauT ke aana ham ko
Dubna hai to kahin paar utarna bhi to hai
Leave a Reply