Mahka Hai Gul-E-KHun-E-Wafa Jaaniye Kya Ho

mahkā hai gul-e-ḳhūn-e-vafā jāniye kyā ho

jaltī hai koī sham-e-hinā jāniye kyā ho

bandish hai nigāhoñ pe dil-o-jāñ pe haiñ pahre

ta.abīr tirī ḳhvāb-e-vafā jāniye kyā ho

muddat se kisī zulf kī ḳhushbū nahīñ aatī

masrūfiyat-e-dast-e-sabā jāniye kyā ho

sho.ala sā lapaktā hai koī rauzan-e-dar se

ḳhandāñ hai phir ik bint-e-hayā jāniye kyā ho

Thahrī hai sabā gardish-e-aflāk rukī hai

kastā hai koī band-e-qabā jāniye kyā ho

baaqī hai abhī talḳhi-e-zahrāb laboñ par

hai phir lab-e-sāqī pe salā jāniye kyā ho

Leave a Comment