ghazal ye jo hamari ho rahi hai
tiri ankhon se jaari ho rahi hai
tum apne shahar ke baare men bolo
yahan to barf-bari ho rahi hai
main ḳhud men hi bikharta ja raha huun
ki mujh men sang-bari ho rahi hai
hamari jeben kaaTi ja chuki hain
talashi kyon hamari ho rahi hai
falak ke kaan hi shayad nahin hain
zamin par ah-o-zari ho rahi hai
koi sailab aa jaa.e na ‘tabish’
musalsal ashk-bari ho rahi hai
Leave a Reply