Bujha Sa Rahta Hai Dil Jab Se Hain Watan Se Juda

bujha sa rahta hai dil jab se hain vatan se juda

vo sehn-e-bagh nahin sair-e-mahtab nahin

base hue hain nigahon men vo hasin kuche

har ek zarra jahan kam ze-aftab nahin

vo bagh-o-ragh ke dil-chasp-o-dil-nashin manzar

ki jin ke hote hue khuld misl-e-khvab nahin

vo juebar-e-ravan ka tarab-faza paani

sharab se nahin kuchh kam agar sharab nahin

ba-rang-e-zulf pareshan vo mauj-ha-e-ravan

ki jin ki yaad men raton ko fikr-e-khvab nahin

sama rahe hain nazar men vo mahv-shan-e-haram

haram men jin ke sitare bhi baryab nahin

vatan ka chhed diya kis ne tazkira ‘akhtar’

ki chashm-e-shauq ko phir arzu-e-khvab nahin

Leave a Comment