Poet
dastan kah ke pareshan dil-e-nakam na ho
is ḳhamoshi men bhi pinhan koi paigham na ho
ishq men bhi hai taqaza miri ḳhuddari ka
jo mire dil ko mili hai vo ḳhalish-e-am na ho
mangne hi ka tariqa nahin aata ham ko
ghair-mumkin hai tiri chashm-e-karam aam na ho
phuul ke saa.e men kanTon ko bhi rahne diije
sub.h ki qadr na ki jaa.e agar shaam na ho
had se jo chiiz bhi baḌhti hai badal jaati hai
kis tarah meri vafaon ka junun naam na ho
aaj kyuun haath tire kaanp rahe hain saaqi
dekh to ḳhuun gharibon ka tah-e-jam na ho
kaun aisa hai jo duniya ki zaban ko roke
main ne maana ki mire lab pe tira naam na ho
jalva-e-husn numayan hai har ik zarre se
kya kiya jaa.e agar zauq-e-nazar aam na ho
kar-e-duniya men lage rahte hain ham ai ‘sharib’
sha.iri us ke liye hai jise kuchh kaam na ho
Leave a Reply