Wafa Naqvi
baḌi udaas hain shamen tire visal ke ba.ad
ki zaḳhm phir se ubhar aa.e indimal ke ba.ad
tumhari baat hi taslim ki bahar-surat
zamane bhar ke dimaghon ne qil-o-qal ke ba.ad
kahan huun kaun huun kaisa huun main kahan ka huun
koi ḳhayal na aaya tire ḳhayal ke ba.ad
hui nasib na izzat hayat men jis ko
saja hua tha vahi ghar men intiqal ke ba.ad
bhula sakegi na suraj ki dastan zamin
gaya hai ḳhema-e-shab men vo kis kamal ke ba.ad
ḳhamoshiyon ki zabanen hain surḳh ankhon men
ajiib tarz-e-takallum hai ik saval ke ba.ad
Leave a Reply