Khinch Laya Tujhe Ehsas-E-Tahaffuz Mujh Tak

khinch laaya tujhe ehsas-e-tahaffuz mujh tak

ham-safar hone ka tera bhi irada kab tha

darguzar karti rahi teri khataen barson

mere jazbat o khayalat tu samjha kab tha

mauj-dar-mauj bhanvar khinch raha tha mujh ko

meri kashti ke liye koi kinara kab tha

zahiran saath vo mere tha magar ankhon se

bad-gumani ke naqabon ko utara kab tha

tujh ko maalum nahin apni vafaon ke evaz

jan-e-jan main ne jo chaha tha ziyada kab tha

do kinaron ko milaya tha faqat lahron ne

ham agar us ke na the vo bhi hamara kab tha

us ne meri hi rifaqat ko banaya mulzim

main agar bhiid men thi vo bhi akela kab tha

vo tira ahd-e-vafa yaad hai ab tak ‘mita’

bhuul baithi huun mohabbat ka zamana kab tha

Leave a Comment