is qadar naaz hai kyuun aap ko yaktai ka
dusra naam hai vo bhi miri tanhai ka
kya chhupe raaz ilahi dil-e-shaidai ka
arsa-e-hashr to bazar hai rusvai ka
jaan le jaega aana shab-e-tanhai ka
kaun ab rokne vaala hai miri aai ka
khugar-e-ranj-o-bala hashr ke din kya khush hon
ki vo maal aaj hua hai shab-e-tanhai ka
zinda hai naam shahadat ka usi ke dam se
tere kushte ne kiya kaam masihai ka
har gali kuche men pamal use ho jaana
dil hai ya naqsh-e-qadam hai kisi harjai ka
is adab se tah-e-shamshir tadapna ai dil
ki guman teri tapish par ho shakebai ka
fitne bhi qaede se uthte hain jab uthte hain
kya saliqa hai tumhen anjuman-arai ka
vo ye kahte hain mira sabr padega tujh par
ab mujhe ranj nahin apni shakebai ka
kya gharaz hai miri taqdir ko mujh se puchhe
aabru ka hai talabgar ki rusvai ka
vaan shab-e-vada mali paanv men mehndi us ne
yaan kaleja koi malta hai tamannai ka
raat bhar shama rahi hijr men vo bhi khamosh
multaji tha tiri tasvir se goyai ka
sar mira kaat ke dahliz par apni rakh do
shauq baaqi hai abhi nasiya-farsai ka
yuun na maqbul hua hoga kisi ka sajda
but ko arman raha meri jabin-sai ka
ho gaya partav-e-rukhsar se kuchh aur hi rang
main ne munh chuum liya us ke tamashai ka
tham gae jam gae ankhon men lahu ke qatre
khuun zahir hai mire sabr o shakebai ka
ban gaya dagh-e-jigar mehr-e-qayamat ai ‘dagh’
par abhi rang vahi hai shab-e-tanhai ka
Leave a Reply