‘zahra’ ne bahut din se kuchh bhi nahin likkha hai
halanki dar-in-asna kya kuchh nahin dekha hai
par likkhe to kya likkhe? aur soche to kya soche?
kuchh fikr bhi mubham hai kuchh haath larazta hai
‘zahra’ ne bahut din se kuchh bhi nahin likkha hai!
divani nahin itni jo munh men ho bak jaae
chup-shah ka roza bhi yunhi nahin rakkha hai
budhi bhi nahin itni is tarah vo thak jaae
ab jaan ke us ne ye andaz banaya hai
har chiiz bhulave ke sanduq men rakh di hai
asani se jiine ka achchha ye tariqa hai
‘zahra’ ne bahut din se kuchh bhi nahin likkha hai!
ghar baar, samajhti thii, qila hai hifazat ka
dekha ki grihasti bhi mitti ka khilauna hai
mitti ho ki patthar ho hiira ho ki moti ho
ghar-bar ke malik ka ghar-bar pe qabza hai
ehsas-e-hukumat ke izhar ka kya kahna!
inaam hai mazhab ka jo haath men koda hai
‘zehra’ ne bahut din se kuchh bhi nahin likkha hai!
divar pe tanga tha farman rifaqat ka
kya vaqt ke dariya ne divar ko dhaya hai
farman-e-rifaqat ki taqdis bas itni hai
ik jumbish-e-lab par hai, rishta jo azal ka hai
‘zahra’ ne bahut din se kuchh bhi nahin likkha hai!
do beton ko kya paala nadan ye samajhti thi
is daulat-e-duniya ki malik vahi tanha hai
par vaqt ne aina kuchh aisa dikhaya hai
tasvir ka ye pahlu ab samne aaya hai
badhte hue bachchon par khulti hui duniya hai
khulti hui duniya ka har baab tamasha hai
maan baap ki surat to dekha hua naqsha hai
dekhe hue naqshe ka har rang purana hai
‘zehra’ ne bahut din se kuchh bhi nahin likkha hai!
socha tha bahan bhaai dariya hain mohabbat ke
dekha ki kabhi dariya rasta bhi badalta hai
bhaai bhi giraftar-e-majburi-e-khidmat hain
bahnon pe bhi taari hai qismat ka jo likkha hai
ik maan hai jo pedon se baten kiye jaati hai
kahne ko hain das bachche aur phir bhi vo tanha hai
‘zehra’ ne bahut din se kuchh bhi nahin likkha hai
Leave a Reply