likhi hui jo tabahi hai us se kya jaata
hava ke ruḳh pe magar kuchh to naḳhuda jaata
jo baat dil men thi us se nahin kahi ham ne
vafa ke naam se vo bhi fareb kha jaata
kashid-e-mai pe hai kaisa fasad hakim-e-shahr
tiri girah se hai kya banda-e-ḳhuda jaata
ḳhuda ka shukr hai tu ne bhi maan li miri baat
rafu purane dukhon par nahin kiya jaata
misal-e-barq jo ḳhvab-e-junun men chamki thi
us agahi ke ta.aqub men huun chala jaata
libas-e-taza ke ḳhvahan hue hain zarra o sang
ik aa.ina hai koi duur se dikha jaata
ajab tamasha-e-sahra hai chak-e-mahmil par
ghubar-e-qais hai parda koi gira jaata
jo aag bujh na sakegi usi ke daman men
har ek shahr hai ijad ka basa jaata
Leave a Reply