jab aftab se chehra chhupa rahi thi hava
nazar bacha ke tire shahr ja rahi thi hava
main us ko rota hua dekhta raha chup-chap
chameli ghaas pe Tap Tap gira rahi thi hava
vo maan hai ab-e-ravan ki tabhi samundar ko
uTha ke god men jhula jhula rahi thi hava
vo ḳhvab tha ya safar aane vaale mausam ka
mari paḌi thi zamin zahr kha rahi thi hava
na-jane dosh pe kis ko uTha ke raat ga.e
tabib-e-shahr ka dar khaTkhaTa rahi thi hava
main garm-o-sard ko taqdir samjhe baiTha raha
nizam-e-mausam-e-hasti chala rahi thi hava
tamam umar main samjha hava muḳhalif hai
mire charagh men ḳhud ko jala rahi thi hava
Leave a Reply