Hakeem Manzoor
koi payam ab na payambar hi aa.ega
vo shab hai asman se patthar hi aa.ega
ja kar vo apne shahr se us ko yaqin hai
paani pe koi naqsh bana kar hi aa.ega
itna badal gaya huun ki pahchanne mujhe
aa.ega vo to ḳhud se guzar kar hi aa.ega
be-dar ka ik makan rulata hai raat din
us ka bhi dil jo hoga kabhi bhar hi aa.ega
kya soch ke gaya hai ḳhalaon ki sair ko
ab ke parind lauT ke be-par hi aa.ega
ḳhushbu ka intizar na kar baiTh kar yahan
shishe ke is makan men patthar hi aa.ega
patthar koi faza men muallaq rahega kyuun
‘manzur’ tai hai ye kisi sar par hi aa.ega
Leave a Reply