Zia Fatehabadi
go aaj andhera hai kal hoga charaghan bhi
taḳhrib men shamil hai ta.amir ka saman bhi
maz.har tire jalvon ke maman miri vahshat ke
kohsar-o-gulistan bhi sahra-o-bayaban bhi
dam toḌti maujen kya sahil ka pata dengi
Thahri hui kashti hai ḳhamosh hai tufan bhi
majbur-e-gham-e-duniya dil se to koi puchhe
ehsas ki rag men hai ḳhar-e-gham-e-janan bhi
bughz-o-hasad-o-nafrat nakami-o-mahrumi
insanon ki basti men kya hai koi insan bhi
divana-e-ulfat ko dar se tire milta hai
har zaḳhm ka marham bhi har dard ka darman bhi
leti hai jab angḌa.i bedar kiran koi
hota hai ‘ziya’ ḳhud hi raqsan bhi ghazal-ḳhvan bhi
Leave a Reply