ye aur baat duur rahe manzilon se ham
bach kar chale hamesha magar qafilon se ham
hone ko phir shikar nai uljhanon se ham
milte hain roz apne kai doston se ham
barson fareb khate rahe dusron se ham
apni samajh men aae badi mushkilon se ham
manzil ki hai talab to hamen saath le chalo
vaqif hain khuub raah ki barikiyon se ham
jin ke paron se subh ki khushbu ke rang hain
bachpan udhar laae hain un titliyon se ham
guzre hamare ghar ki kisi rahguzar se vo
parde hatae dekhen unhen khidkiyon se ham
ab to hamare beach kabhi duriyan bhi hon
tang aa gae hain roz ki nazdikiyon se ham
jab bhi kaha ki yaad hamari kahan unhen
pakde gae hain thiik tabhi hichkiyon se ham