duniya-e-dani hai matlab ki sab rishte naate toḌ diye
ab ḳhud pe bharosa karna hai jitne the sahare chhoḌ diye
ab dil se dil ka milna kya bas haath milana kaafi hai
derina taur tariqon ne chalte chalte dam toḌ diye
duniya-e-mohabbat ke andar nafrat ka andhera jin se baḌhe
us daur-e-taraqqi ke aise jitne hain uTha kar toḌ diye
jo andhiyon se Takra bhi saken zulmat ka fusun bhi toḌ saken
taqon men saja kar pahle hi to kuchh aise rakh chhoḌ diye
kya milna-julna aapas men ye sab kahne ki baten hain
ham dekh chuke is daur ne to dil toḌ diye sar joḌ diye
jab zulm ke tufan umḌe hain jab yaas ke badal chha.e hain
duniya ko diya hai azm-e-javan tariḳh ko ham ne moḌ diye
ai daur-e-siyasat ahd-e-zabun ‘jarrar’ se ye ummid na rakh
us dar pe jhuka di peshani haath us ke aage joḌ diye
Leave a Reply