hamari tishna-labi ab subu se khelegi
fughan-e-dil rag-e-jan-o-gulu se khelegi
sambhal ke rahna ki is baar saiqal-e-abru
koi baiid nahin aabru se khelegi
karega sail har ik lahr ko buland apni
har ek mauj faqat aabju se khelegi
jasarat-e-rah-e-pur-khar dekhiye to sahi
ye kah rahi hai miri justuju se khelegi
bahut shagufta-o-rangin guftugu hai ‘siraj’
chaman men baat tiri rang-o-bu se khelegi
Leave a Reply