Poet
kuchh apni baat kaho kuchh miri suno mat so
ye raat phir nahin aane ki dosto mat so
kise ḳhabar ki saba kya payam le aa.e
sada dilon ke dariche khule rakho mat so
bujhin jo sham.en to raushan karo dilon ke charagh
na bujhne vaale sitaron ka saath do mat so
jo sun sako to suno tishna-ruh ki fariyad
misal-e-saghar mai-e-daur men raho mat so
ḳhirad ka kahna hai so jaao vo na aa.ega
pukar dil ki yunhi jagte raho mat so
na so saken jo ham avargan-e-kucha-e-shauq
to tum bhi shahr ki shab-tab mah-vasho mat so
ye jalti-bujhti si yadon ki kahkashan ‘ishqi’
bikhar na jaa.e ghazal hi koi kaho mat so
Leave a Reply