abdul-ahad-saaz

Hum Apne Zakhm Kuredte Hain Wo Zakhm Parae Dhote The

ham apne zakhm kuredte hain vo zakhm parae dhote the

jo ham se ziyada jante the vo ham se ziyada rote the

achchhon ko jahan se utthe hue ab kitni dahaiyan biit chukin

akhir men udhar jo guzre hain shayad un ke par-pote the

in pedon aur pahadon se in jhilon in maidanon se

kis mod pe jaane chhut gae kaise yarane hote the

jo shabd udanen bharte the azad faza-e-maani men

yuun sher ki bandish men simte goya pinjron ke tote the

vo bhige lamhe soch bhare vo jazbon ke chaqmaq kahan

jo misra-e-tar de jaate the lafzon men aag pirote the

ye khushk qalam banjar kaghaz dikhlaen kise samjhaen kya

ham fasl nirali katte the ham biij anokhe bote the

ab ‘saz’ nashebon men dil ke bas kichad kaali daldal hai

yaan shauq ke Dhalte jharne the yaan gham ke ubalte sote the

More Poems

Leave a Comment