sarhad-e-gul se nikal kar ham juda ho ja.enge
kal tumhari qaid-e-ḳhushbu se riha ho ja.enge
zehn men ehsas-e-ruḳhsat hi na hoga shaam tak
baḌhte baḌhte din ke lamhe yuun hava ho ja.enge
chhoḌ jaao daman-e-imroz men bhi kuchh na kuchh
varna tum se ta.ir-e-farda ḳhafa ho ja.enge
jab na ho kar-e-nafas to phir hamare saath saath
ye zamin-o-asman donon fana ho ja.enge
samne hai sa.at-e-aḳhir ka an-dekha azaab
umr-bhar kahte rahe ab be-nava ho ja.enge
Leave a Reply