vaqt-e-ruḳhsat miri maan ne mira matha chuma
manzilon ne tabhi baḌh kar mira talva chuma
di muazzin ko dava niind ki aur phir kal shab
ham ne ji bhar ke tumhen ḳhvab men dekha chuma
jis tarah qimti shai ko koi muflis dekhe
ankhon ankhon men use ham ne saraha chuma
ham ne socha tha ki sairabi mayassar hogi
tishnagi aur baḌhi hai use jitna chuma
ek misre men suno vasl ka puura qissa
az isha-ta-ba-sahar yaar ko chuma chuma
is tariqe se nahin pyaar jataya mujh se
jis tariqe se hai us ne mira bachcha chuma
ye badan dasht se gulshan hua aḳhir kaise
aankh chumi hai kisi ki ki hai dariya chuma
meri ankhon ke ujalon ka sabab hai itna
naam sunte hi mohammad ka anguTha chuma
Thiik hone na diya zaḳhm-e-mohabbat ‘asi’
ham ne ta-umr ise dil se lagaya chuma
Leave a Reply