tufan-e-mohabbat laakh uThe tufan se lekin hasil kya
jo Duub ga.i vo kashti kya jo haath aaya vo sahil kya
ye barq-o-sharar ye shams-o-qamar dete hain nishan-e-manzil kya
ai dost hamen ho sakta hai andaza-e-rang-e-mahfil kya
kya kahiye ki dard-e-furqat se ‘ehsas’ taḌapta hai dil kya
taskin to maana mumkin hai taskin se lekin hasil kya
ham duur se kya andaza karen kya naz-o-niyaz-e-ulfat the
parvane se hone vaali thi tauhin-e-mazaq-e-mahfil kya
hai rah-e-mohabbat rah-e-raza andesha-e-sud-o-ziyan kaisa
main kyuun dekhun asan hai kya main kyuun dekhun hai mushkil kya
tauhin-talab tauhin-e-junun tauhin uruj-e-manzil hai
main jis pe pahunch ja.un hamdam ho sakti hai meri manzil kya
iz.har-e-gham-e-dil karna to ‘ehsas’ ba-har-hal asan hai
ashkon ki faqat do bundon ka ankhon se nikalna mushkil kya
Leave a Reply