abid-wadood

Waqt Ke Sath Zindagi Ka Dukh

vaqt ke saath zindagi ka dukh

mire sar par hai har khushi ka dukh

apne zakhmon ko bhuul jaata huun

dekh leta huun jab kisi ka dukh

laila-e-har-sukhan pareshan hai

jab qalam men hai be-kasi ka dukh

ham-safar ab nahin koi mera

mera sathi hai ham-rahi ka dukh

aaj mearaj ho gai meri

aaj banta hai bandagi ka dukh

zindagi saari bandagi meri

mera sajda hai aadmi ka dukh

tere shams-o-qamar mire kis kaam

mere ghar men hai tirgi ka dukh

mar gaya apne vaste farhad

us ne kab sar liya kisi ka dukh

kah rahi hai numud ki har lai

band kaliyon men hai nami ka dukh

har talab se gurez-pa ik shakhs

chatta hai rahi sahi ka dukh

zindagi saari rog men guzri

tha ba-zahir jo ik ghadi ka dukh

har koi us ka saath deta hai

jo nahin bantta kisi ka dukh

vo sharik-e-safar nahin hota

main uthata huun dosti ka dukh

yad-e-yaran lahu rulaegi

aur phir ek ajnabi ka dukh

ghat gaya chand raushni maddham

meri ankhon men raushni ka dukh

jaan par ban gai ki aalam par

jaan leva hai agahi ka dukh

More Poems

Leave a Comment