zabt kar aah baar baar na kar
gham-e-ulfat ko sharmsar na kar
jis ko khud apna eatibar na ho
aise insan ka eatibar na kar
us ke fazl-o-karam pe rakh nazren
apne sajdon ka eatibar na kar
baagh ujadne ka gham hi kya kam hai
jaane bhi de gham-e-bahar na kar
log tujh ko haqir samjhenge
had se zaaid bhi inkisar na kar
vaqt se faeda utha lekin
vaqt ka koi eatibar na kar
lutf utha bas nigah-e-avval se
har nazar ko gunahgar na kar
jis se fitne bapa hon duniya men
aise ghafil ko hoshiyar na kar
‘qadr’ ko tu ne di hai jab izzat
ai khuda us ko be-vaqar na kar
Leave a Reply