Nazeer Akbarabadi
aan rakhta hai ajab yaar ka lad kar chalna
har qadam naaz ke ghusse men akad kar chalna
jitne ban ban ke nikalte hain sanam nam-e-khuda
sab men bhata hai mujhe us ka bigad kar chalna
na-tavani ka bhala ho jo hua mujh ko nasib
us ki divar ki inton ko ragad kar chalna
us ki kakul hai buri maan kaha ai afi
dekhiyo us se tu kandha na ragad kar chalna
chalte chalte na khalish kar falak-e-dun se ‘nazir’
faeda kya hai kamine se jhagad kar chalna
Leave a Reply