Saleem Shahid
in dar-o-divar ki ankhon se paTTi khol kar
Dubte suraj ka manzar dekh khiḌki khol kar
ashk ankhon men agar kuchh hain to kar shab ka safar
raste men asman baiTha hai jholi khol kar
aur kuchh taaza lakiren shakl ke ḳhake pe hain
dekh apne haath ka a.ina muTThi khol kar
paikar-e-mafhum ban kar bhi kabhi pahlu men aa
lafz dete hain sada bab-e-ma.ani khol kar
sat.h-e-dariya par bhaḌak uThi hai phir maujon ki aag
kaun is tufan men utrega kashti khol kar
le uḌe taa.ir qafas ki tiliyan parvaz men
ab gale men Daal de pairon se rassi khol kar
baḌh ga.i kuchh aur pyasi ketiyon ki tishnagi
abr chhaya tha magar barsa nahin ji khol kar
ho ga.e abad mere jism ke divar-o-dar
kaun ghar men aa gaya darvaza ḳhud hi khol kar
dhuup men sukhe hue patte hava dene lage
band lab goya hue qufl-e-ḳhamoshi khol kar
kya ajab ‘shahid’ ki meri dastan is men bhi ho
jo kitab ik baar bhi main ne na dekhi khol kar
Leave a Reply