ruuh ke jaane ki qalib se koi muddat nahin
sabr kar ai dil tujhe kya sabr ki taqat nahin
kya miri betabi-e-dil bais-e-vahshat nahin
ye khalish pahlu ki mere monis-e-ghurbat nahin
dil nahin hai vo nahin hai ishq ka jis men guzar
vo bhi koi aankh hai jis aankh men hasrat nahin
koi khvahan sim-o-zar ka koi talib takht ka
mere aage faqr se behtar koi daulat nahin
aao baitho shauq se khud ko chhupa kar dil men tum
is se behtar do-jahan men gosha-e-uzlat nahin
khulq himmat aur muravvat hain sharaf insan ke
vo kabhi insan nahin hai jis men ye halat nahin
khun-e-dil piita hai aur khata hai vo lakht-e-jigar
ab-o-dana ki tire bimar ko hajat nahin
le ke dil mera dam-e-rukhsat vo ye kahne lage
khilat-e-tahsin se behtar koi bhi khilat nahin
ai ‘jamila’ surat-e-tasvir main khamosh huun
zoaf had se badh gaya nalon ki ab qudrat nahin
Leave a Reply