naya ik zaḳhm khana chahta huun
main jiine ko bahana chahta huun
rula deti hai har sachchi kahani
main ik jhuTa fasana chahta huun
mahak se jhuum uThe saara jivan
main aisa gul khilana chahta huun
mohabbat meri behad ḳhud-gharaz hai
tujhe sab se chhupana chahta huun
ye pagal-pan nahin to aur kya hai
main sach-much muskurana chahta huun
bahut ma.asum tha vo daur-e-vahshat
main phir jangal basana chahta huun
khaao ḳhvab ya lahrao saghar
main ḳhud ko bhuul jaana chahta huun
ḳhudaya dard ko de aur shiddat
ki main ab haar jaana chahta huun
vo aa jaa.en to dil par ho na qaabu
vahi qissa purana chahta huun
mire har dukh ka karan hain ye ankhen
main ye dipak bujhana chahta huun
koi shahzad ko mujh paas laa.e
main us ka dukh baTana chahta huun
Leave a Reply